Çfarë raportuan mediat

Më 27 qershor 2026, Gazeta Tema publikoi artikullin si më poshtë:

Artikulli i faqes online.

Në pamje të parë, artikulli ngjan si një citim rutinë i ish-sekretares së PD-së, Jola Hysaj, e cila shkruante:

“Ja urdhëroni, Internacionalja Komuniste në veprim. Kurrë, kurrë, kurrë me këta dhe me asgjë që këta përfaqësojnë… Jo Manipulimit, Jo Hienave Politike”.

Por elementi kryesor i artikullit ishte në fakt fotografia e vendosur në krye të tij, ku eurodeputetja Ilaria Salis dhe Lëvizjen Bashkë shfaqen duke ngritur grushtin lart.

Çfarë gjetëm

1..Fotoja origjinale nuk ka grushta të ngritur

Në foton origjinale, të publikuar nga vetë eurodeputetja Ilaria Salis në llogarinë e saj në X (Twitter), asnjë nga të pranishmit nuk e ka ngritur grushtin. Fotoja origjinale e postuar nga Ilaria Salis në X (Twitter).

2..Fotoja është e manipuluar me IA

Verifikimi në SightEngine tregon se fotoja është manipuluar përmes Inteligjencës Artificiale. SightEngine.

3..Shpërndarja e dezinformimit me 'duar të pastra'

Me sa duket, Gazeta Tema shpërndan dezinformimin pa marrë përgjegjësi direkte. Ajo shmang mbajtjen e një qëndrimi në trupin e artikullit, por lë foton e rreme dhe citatin të plotësojnë njëra-tjetrën.

Analiza

Kur një media publikon një foto të tillë pa asnjë etiketë (si p.sh. “Fotomontazh” apo “Krijuar me IA”), ajo kalon nga raportimi i lajmit në fabrikim të tij. Publiku i gjerë reagon shumë më shpejt ndaj stimujve vizualë sesa ndaj tekstit. Duke parë grushtat e ngritur, shumë lexues binden automatikisht për narrativën e “Internacionales Komuniste” pa e lexuar fare artikullin ose pa e vënë në dyshim vërtetësinë e fotos.

Si ta dallosh herën tjetër

  • Shikoni me kujdes duart:

Inteligjenca Artificiale ende ka probleme me gjenerimin e duarve të njeriut. Shpesh në fotot e manipuluara me IA, gishtat duken të deformuar, mungojnë, ose janë më shumë se pesë. Po ashtu, ndriçimi i dorës së shtuar shpesh nuk përputhet me dritën e pjesës tjetër të trupit.

  • Kërkoni burimin fillestar:

Nëse një politikan vendas ose i huaj mban një takim publik, me siguri ata e kanë postuar atë në rrjetet e tyre sociale. Verifikoni profilin e tyre në Facebook, Instagram ose X për të parë versionin e vërtetë të ngjarjes.

  • Analizoni lidhjen Foto-Tekst:

Nëse një media vendos një foto tronditëse por asnjëherë nuk flet për detajet e asaj fotoje në tekstin e vet (duke u mjaftuar vetëm me citimin e një pale të tretë), jini skeptik.

Verdikti

Fotoja që tregon Ilaria Salis dhe Lëvizjen Bashkë me grushtin e ngritur lart është e rreme. Imazhi origjinal është manipuluar me Inteligjencë Artificiale dhe është përdorur në mbështetje të narrativës së artikullit. Për shkak të kësaj, këtij lajmi i japim verdiktin: I rremë.

Klasifikimi

Ky rast klasifikohet si dezinformim. Gazeta Tema ka përdorur imazhin e rremë për të mbështetur një narrativë politike, duke shmangur njëkohësisht çdo deklaratë të drejtpërdrejtë, një mekanizëm i njohur i shpërndarjes së dezinformimit me “duar të pastra”.