Çfarë raportoi media
Më 2 korrik 2026, faqet online të JOQ Albania dhe Gazeta Metro publikuan lajmin me titujt si më poshtë:
Sipas tyre, një pronar shtëpie në Indonezi, i lodhur nga vjedhjet e vazhdueshme dhe mosveprimi i policisë, u ngriti një kurth katër personave që kishin hyrë natën në oborrin e tij. Artikulli thekson se burri i lidhi hajdutët me nastro duke u lënë zbuluar vetëm sytë dhe hundën, për t’i bërë të ngjanin si Teletubbies. Ai i filmoi për t’i poshtëruar publikisht dhe më pas i dorëzoi në polici.
Lajmi ngjalli menjëherë reagime, ku shumë komentues përgëzonin pronarin e shtëpisë ndërsa të tjerët e cilësonin si ndëshkim të ekzagjeruar.
Çfarë gjetëm
1..Nuk janë hajdutë, por YouTubers
Pamjet janët reale, por historia pas tyre është krejtësisht e sajuar. Media indoneziane Detik News ka zbardhur të vërtetën pas tyre. Personat e lidhur me ngjitës nuk janë kriminelë, por anëtarë të një grupi të quajtur “Batre TV”, një kanal në YouTube nga qyteti i Malangut në Javën Lindore, të cilët prodhojnë video humoristike.
2..Një sfidë gjatë një transmetimi 'Live'
Videoja u xhirua gjatë një transmetimi të drejtpërdrejtë (live stream). Njëri nga YouTuberat pranoi të mbështillej me nastro në sajë të një “sfide” të kërkuar nga ndjekësit e tyre. Nuk ka pasur asnjë vjedhje, asnjë pronar të zemëruar dhe asnjë ndërhyrje të policisë.
3..Shpërndarja e videos dhe sajimi i historisë
Sipas vetë YouTuberave, pjesë nga transmetimi i tyre live u morën pa leje nga disa llogari të tjera në Instagram, të cilat i bashkëngjitën videos një narrativë të trilluar rreth “hajdutëve të kapur” për ta bërë atë më tërheqëse dhe virale. Kjo narrativë e rreme u përkthye më pas edhe në gjuhën shqipe nga JOQ Albania dhe Gazeta Metro.
Analiza
Kjo nuk është hera e parë që mediat sociale marrin pamje absurde (humor, sfida në internet) dhe i shpërndajnë ato si lajme të vërteta, pa bërë verifikimet e nevojshme.
Historia e “qytetarit të thjeshtë që mposht hajdutët pasi policia nuk e ndihmon” është një klishe e preferuar në internet. Ajo ngjall emocione të forta: nga njëra anë ndjenjën e zhgënjimit ndaj autoriteteve, dhe nga ana tjetër ndjesinë e drejtësisë së vënë në vend kur shohim kriminelët të poshtërohen në mënyra kreative.
Si ta dallosh herën tjetër
- Përdorni logjikën:
Mbështjellja e një njeriu tërësisht me shirit ngjitës duke lënë vetëm flegrat e hundës zbuluar, mbart rrezik asfiksimi. Nëse kjo do ishte një ngjarje e vërtetë, me shumë gjasa policia do ta kishte arrestuar pronarin e shtëpisë për torturë.
- Gjeni burimin origjinal:
Një kërkim i fotos në Google (Reverse Image Search) të çon shumë shpejt te burimi origjinal dhe ngjarja e vërtetë pas pamjeve.
- Kërkoni raportimet nga media serioze lokale:
Nëse lajmi ndodh në Indonezi, a ka ndonjë media serioze që e ka raportuar? Në këtë rast, mediat serioze po raportonin të kundërtën: faktin që videoja ishte e rreme.
Verdikti
Pretendimi se videoja tregon hajdutë të lidhur me ngjitës nga një pronar shtëpie për t’i bërë të duken si “Teletubbies” nuk është i vertetë. Edhe pse pamjet janë reale, ato janë shkëputur nga konteksti dhe janë shpërndarë bashkangjitur me një histori të sajuar. Si rrjedhojë, këtij lajmi i japim verdiktin: I rremë.
Klasifikimi
Ky rast klasifikohet si çinformim; përmbajtje e rreme që u shpërnda nga mediat shqiptare pa verifikim, pa qëllim mashtrimi, por me pasoja çinformuese për publikun.